Зургадугаар сарын ногоон бороо

Билгийн тооллоор энэ сар бол хар морин сар. Зуны эхэн сарын бороо гэдэг амраг хайртын уруул мэт хэмээн нэгэн яруу найрагч томьёолсон байдаг. Аль ч сарын бороо зургадугаар сарын бороо шиг тариа, ногооны шим, үндсийг тэтгэж рашаан лугаа хүний хүслэн болж чаддаггүй билээ. Ер нь зуны эхэн сарын бороог янз бүрээр л нэрлэсээр ирсэн. Ногоон бороо, шимт бороо гээд л улс орон бүр өөрсдийн гэсэн бэлгэшээсэн нэршилтэй. Ялангуяа эрт дээр үеэс газар тариалан эрхэлдэг, суурин соёл иргэншилтэй орнууд тариа ногооны ургамлын өсөлтөд чухал нөлөөтэй учир зургадугаар сарын бороог тахин шүтэж ирсэн. Манай нүүдлийн малчин ард түмний хувьд зуны эхэн сарын бороо гэдэг гандсан байгалийг сэргээж, бэлчээрийн чанарыг сайжруулдаг.

Бусад сарын бороонууд ч дээ. Нэг бол хүйтэн, нэг бол шороо, тоос дарсан л юм байдаг шүү дээ. Улаанбаатар хотод хар морин сарын бороо харин ч нэг цутгах шиг болж байна. Нийслэл хот ч гэлтгүй Монгол орон даяар рашаан лугаа зургадугаар сарын бороон дунд сонгуулиа өгч, ковидыг мартагнаж сэтгэл тэнүүн наадамлах гээд байж байна. Ер нь байгаль дэлхий ийн сэргэсэн учир энэ өнгөөрөө л намартай залгах байх даа. Хар морин сарын борооны ачаар гол нь бид ургац сайтай, гэдэс цатгалан эдийн засгийн хямралыг давах нь ээ. Байгаль дэлхий хишгээ ийн хайрлаж, наадмаар хурдан морь нь ногоон тал дээгүүр уралдаж, хүчит бөхчүүд минь зүлгэн дээр эр бяраа гарган сайхан наадах нь ээ. Өдгөө “Бороо бороо оройсой, Оросын маамуу ирээсэй” гэх багачуулын дууг Реппер Гинжин, Mrs.M нар шинэчлэн дуулж, машинтай болгоны хөгжимд эгшиглэж, ipod-той болгоны чихэнд хангинаж байна. Баярлалаа, хар морин сарын бороо минь.

Б.АМАРТҮВШИН